نافقني....نافقك

قهوة الصباح مع الأستاذة (س ـ ح).

البعض كيسميه "فن التعامل" والبعض الآخر "الذكاء الإجتماعي" ولكن فكل الأحوال كيبقى نفاق، هاد السلوك لي صبح أمر طبيعي وأسلوب معترف به والأغلبية كتمارسوا، حيث أصبح الإنسان كيبين عكس ما كيخفي، كيبين الحب والإحترام وهو كيخفي الكره والحسد، كيبالغ بالمدح والإطراء وهو كيحس بالإشمئزاز والغثيان، كيتلون في علاقاته مع الناس باش يحقق مصالحو الشخصية، صبح الإنسان عندو بزاف ديال الوجوه وكيتوفر على مجموعة من الأقنعة لي كل مرة كيلبس واحد على حساب الموقف لي هو فيه. ويا إلاهي إلى الإنسان بانت ليه المرقة فإنسان آخر، فهنا كترتفع نسبة التملق والمجاملة حتى كتبلغ واحد المستوى مهول ولو يكون الإنسان المجامل (الفتحة فوق الميم) كذاب، شفار، غشاش.... ولي كيجاملو واعي فقرارة نفسو بكل هاد الصفات.
ولي صبح ملاحظ كذلك وعلى الجهد هو السكوت عن أخطاء الآخرين، وفقدان القدرة على المواجهة الشيء لي كيخلي الإنسان يهضر مورا ضهر إنسان آخر عوض يجيه نيشان، وهكا كتختلف الأنواع والأشكال وفالأخير كتبقى النتيجة واحدة: النفاق لي يا ربي تعفو علينا منو.